IPL 2025: સનરાઈઝર્સ હૈદરાબાદ માટે રાહત, નીતિશ રેડ્ડી ટૂંક સમયમાં ટીમમાં થશે સામેલ.

હૈદરાબાદે IPL 2025 પહેલા નીતિશને છ કરોડ રૂપિયામાં રિટેન કર્યો હતો. Nitish Reddy ગયા સિઝનમાં 13 મેચમાં 143ના સ્ટ્રાઈક રેટથી 303 રન બનાવ્યા હતા. નીતિશે ભારતના ઓસ્ટ્રેલિયા પ્રવાસ દરમિયાન પણ પ્રભાવ પાડ્યો હતો.

IPL 2025 પહેલા સનરાઇઝર્સ હૈદરાબાદ માટે એક રાહતભરી ખબર આવી છે. તેમના ઓલરાઉન્ડર નીતિશ કુમાર રેડ્ડી સાઈડ સ્ટ્રેનની ઈજામાંથી સંપૂર્ણપણે સાજા થઈ ગયા છે અને તેમણે ફિટનેસ ટેસ્ટ પાસ કરી લીધો છે. નીતિશ ટૂંક સમયમાં ટીમ સાથે જોડાશે. તેઓ ઈજાના કારણે જાન્યુઆરીથી મેદાનથી દૂર હતા. ન્યૂઝ એજન્સી PTIના રિપોર્ટ મુજબ, નીતિશે ભારતીય ક્રિકેટ કન્ટ્રોલ બોર્ડ (BCCI) ના સેન્ટર ઓફ એક્સેલન્સમાં યો-યો ટેસ્ટ સહિત તમામ ફિટનેસ ટેસ્ટ પાસ કર્યા છે અને ફિઝિયોએ IPLમાં રમવા માટે ગ્રીન સિગ્નલ આપી દીધું છે.

જાન્યુઆરીમાં છેલ્લીવાર મેદાન પર ઊતર્યા હતા

આંધ્રપ્રદેશના 21 વર્ષીય આ ખેલાડીએ ભારત માટે છેલ્લીવાર 22 જાન્યુઆરીએ મેચ રમી હતી. નીતિશ ઇંગ્લેન્ડ સામેની પ્રથમ T20 માટે ભારતીય ટીમમાં સામેલ થયા હતા, પરંતુ તેમને બેટિંગ અથવા બોલિંગ કરવાની તક મળી નહોતી. ચેન્નાઈમાં બીજા T20 પહેલા નીતિશે નેટમાં પ્રેક્ટિસ કરી હતી, પરંતુ ઈજાના કારણે તેઓ પાંચ મેચની સિરીઝના બાકીના તમામ મેચમાંથી બહાર થઈ ગયા હતા.

Nitish Reddy એ IPL 2025 માટે તૈયારીઓ શરૂ કરી

હૈદરાબાદે IPL 2025 પહેલા નીતિશ રેડ્ડીને ₹6 કરોડમાં રિટેન કર્યો હતો. ગયા સિઝનમાં તેમણે 13 મેચમાં 143ના સ્ટ્રાઈક રેટ સાથે 303 રન બનાવ્યા હતા. ભારતના ઓસ્ટ્રેલિયા પ્રવાસ દરમિયાન પણ તેમણે પ્રભાવશાળી પ્રદર્શન કર્યું હતું અને મેલબોર્નમાં રમાયેલી ચોથી ટેસ્ટમાં 114 રનની મહત્વપૂર્ણ ઈનિંગ રમી હતી. હવે નીતિશ ટૂંક સમયમાં હૈદરાબાદની ટીમ સાથે જોડાશે. IPL 2025 ની શરૂઆત 22 માર્ચથી થઈ રહી છે અને હૈદરાબાદની ટીમ 23 માર્ચે રાજસ્થાન રોયલ્સ સામે હૈદરાબાદમાં પોતાનો પહેલો મુકાબલો રમશે.

Jasprit Bumrah IPLના પ્રારંભિક તબક્કામાં બહાર રહી શકે

એક તરફ જ્યાં હૈદરાબાદ માટે રાહતભરી સમાચાર છે, ત્યાં બીજી તરફ મુંબઈ ઈન્ડિયન્સ માટે એક મોટો ઝટકો લાગી શકે છે. સ્ટાર ફાસ્ટ બોલર જસપ્રીત બુમરાહ IPLના શરૂઆતના મેચોમાં ઉપલબ્ધ ન હોવાની શક્યતા છે. બુમરાહ ઓસ્ટ્રેલિયા સામે જાન્યુઆરીમાં સિડનીમાં રમાયેલી પાંચમી અને છેલ્લી ટેસ્ટ દરમિયાન ઈજાગ્રસ્ત થયા હતા અને બીજી ઇનિંગમાં બોલિંગ કરી શક્યા નહોતા. ચેમ્પિયન્સ ટ્રોફી માટે તેમની પસંદગી થઈ હતી, પરંતુ તેઓ સંપૂર્ણપણે ફિટ ન હોવાથી અંતિમ ટીમમાં સામેલ કરાયા નહોતા. અહેવાલો અનુસાર, બુમરાહ IPL 2025ના પ્રારંભિક તબક્કામાં બહાર રહી શકે છે.

IPL 2025: કૅપ્ટનશિપમાં સૌથી સફળ ધોની, 2018 પછી રાહુલ છે ટોચના સ્કોરર.

આઈપીએલ 2025ની શરૂઆત થવા જઈ રહી છે, અને એક વખત ફરી 10 ટીમો ખિતાબ માટે પોતાનું શ્રેષ્ઠ આપવા માટે મેદાને ઉતરશે. આઈપીએલનો આ સીઝન 22 માર્ચથી શરૂ થશે, જેમાં પ્રથમ મેચમાં ગત વિજેતા કોલકાતા નાઈટ રાઇડર્સ (KKR) અને રોયલ ચેલેન્જર્સ બેંગલુરુ (RCB) આમને સામને થશે. આ વખતે મેગા ઓક્શન બાદ ઘણી ટીમો બદલાઈ ગઈ છે, અને નવા કપ્તાનોની જાહેરાત પણ થઈ ચૂકી છે.

કૅપ્ટન તરીકે સૌથી વધુ મેચ જીતનારા Dhoni

કેટલીક ટીમો નવા કૅપ્ટન સાથે મેદાનમાં ઉતરશે, જ્યારે કેટલીક જૂના કૅપ્ટન પર વિશ્વાસ રાખી રહી છે. ચેન્નઈ સુપર કિંગ્સ (CSK) એ પણ પોતાની કૅપ્ટનશિપ બદલવાની જાહેરાત કરી છે, અને આ વખતે ટીમ રુતુરાજ ગાયકવાડના નેતૃત્વ હેઠળ રમશે. જો કે Mahendra Singh Dhoni એ હવે CSKની કૅપ્ટનશિપ છોડી છે, પણ આઈપીએલના ઈતિહાસમાં સૌથી વધુ જીત પ્રદાન કરનાર કૅપ્ટનનો રેકોર્ડ હજુ પણ ‘કૅપ્ટન કૂલ’ ધોનીના નામે જ છે.

ધોનીએ 226 IPL મેચોમાં કૅપ્ટનશિપ સંભાળી છે, જેમાંથી 133 મેચ જીત્યા અને 91 હાર્યા છે. આ કારણે તેમની જીતનો ટકા 58.84% છે, જે IPL ઈતિહાસમાં કોઈ પણ અન્ય કૅપ્ટન કરતા વધુ છે. આ યાદીમાં બીજા સ્થાને સચિન તેંડુલકર છે. સચિને માત્ર 51 મેચમાં કૅપ્ટનશિપ સંભાળી, જેમાં 30 જીત્યા અને 21 હાર્યા. તેમનું જીત પ્રમાણ 58.82% છે, જે ધોની કરતા 0.2% ઓછું છે.

આજના સમયમાં Shreyas અને Hardik પણ ટોચની યાદીમાં

વર્તમાન સમયમાં માત્ર બે કૅપ્ટનો એવા છે, જેમણે આ યાદીમાં પોતાનું સ્થાન બનાવી લીધું છે – હાર્દિક પંડ્યા અને શ્રેયસ અય્યર.

• હાર્દિક પંડ્યા: 45 મેચ | 26 જીત | 19 હાર | 57.77% જીત પ્રમાણ
• શ્રેયસ અય્યર: 70 મેચ | 38 જીત | 29 હાર | 54.28% જીત પ્રમાણ

IPLમાં કૅપ્ટન તરીકે જીતનો ટકા

2018થી અત્યાર સુધી સૌથી વધુ રન બનાવનાર ખેલાડી

2018 પછી IPLમાં સૌથી વધુ રન બનાવનારા બેટ્સમેન K.L. રાહુલ છે, જે હવે દિલ્હી કેપિટલ્સ માટે રમશે. રાહુલે 2018થી અત્યાર સુધી 50.10 ની એવરેજ અને 136.4 ના સ્ટ્રાઈક રેટ સાથે 3958 રન બનાવ્યા છે, જે આ સમયગાળામાં કોઈપણ ખેલાડી કરતા વધુ છે.

આઈપીએલ 2025 માટે હવે ગણતરીના દિવસો બચ્યા છે, અને ધોની, રાહુલ, હાર્દિક, કોહલી જેવા ખેલાડીઓ ફરી મેદાનમાં કમાલ બતાવવા તૈયાર છે.

WPL 2025 : પર્પલ કેપ માટે હેલી મેથ્યુઝ અને અમેલિયા કેર વચ્ચે મહામુકાબલો.

મુંબઇ ઇન્ડિયન્સની 2 ખેલાડીઓ વચ્ચે પર્પલ કેપ માટે રસપ્રદ જંગ ચાલી રહી છે. હકીકતમાં, મુંબઇ ઇન્ડિયન્સની Hayley Matthews અને Amelia Kerr પર્પલ કેપની રેસમાં સૌથી આગળ છે.

આજે વિમન્સ પ્રીમિયર લીગના ત્રીજા સિઝનનો ફાઇનલ મેચ રમાશે, જ્યાં મુંબઈ ઈન્ડિયન્સ અને દિલ્હી કેપિટલ્સ એકબીજા સામે ટકરાશે. બંને ટીમો વચ્ચેનો મુકાબલો મુંબઈના બ્રેબોર્ન સ્ટેડિયમમાં યોજાશે. ખાસ વાત એ છે કે આ ફાઇનલમાં પર્પલ કેપ માટે મુંબઇ ઈન્ડિયન્સની બે ખેલાડીઓ હેલી મેથ્યુઝ અને અમેલિયા કેર વચ્ચે જબરદસ્ત મુકાબલો જોવા મળશે.

Hayley Matthews અને Amelia Kerr વચ્ચે કટાકટ ટક્કર

હેલી મેથ્યુઝએ અત્યાર સુધી 9 મેચમાં 15.88ની એવરેજ અને 8.10ની ઈકોનોમી રેટથી 17 વિકેટ ઝડપી છે, જ્યારે અમેલિયા કેરે 9 મેચમાં 16.37ની એવરેજ અને 7.93ની ઈકોનોમી રેટથી 16 વિકેટ ઝડપી છે. એટલે કે, હેલી મેથ્યુઝ અને અમેલિયા કેર વચ્ચે ફક્ત 1 વિકેટનો જ અંતર છે.

હેલી મેથ્યુઝ અને અમેલિયા કેર બાદ ત્રીજા સ્થાને રોયલ ચેલેન્જર્સ બેંગલોરની જ્યોર્જિયા વેરહામ છે, જેમણે 8 મેચમાં 12 વિકેટ ઝડપી છે, પણ RCB હવે ટૂર્નામેન્ટમાંથી બહાર થઈ ગઈ છે. ચોથા સ્થાને ગુજરાત જાયન્ટ્સની કાશવી ગૌતમ છે, જેમણે 8 મેચમાં 12 વિકેટ ઝડપી છે.

દિલ્હી કેપિટલ્સની સ્પિનર જેસ જોનાસેન આ યાદીમાં પાંચમા નંબરે છે, જેમણે 7 મેચમાં 11 વિકેટ ઝડપી છે. આજે ફાઇનલ મેચમાં જોવા લાયક રહેશે કે હેલી મેથ્યુઝ પોતાની પર્પલ કેપ જાળવી રાખે છે કે અમેલિયા કેર તેને પાછળ છોડી આપે છે. માત્ર 1 વિકેટનો અંતર હોવાથી આ રેસ અતિઉત્સાહજનક બની ગઈ છે.